Körfuknattleikur

Yngri flokkar - Meistaraflokkur

Fréttir

Höttur - Skallagrímur, fimmtud. kl. 18:30

  • Skoða sem PDF skjal

Fyrsti leikur Íslandsmótsins í 1. deild körfubolta hjá Hetti fer fram fimmtudaginn 13. október kl. 18:30 í Íþróttamiðstöðinni á Egilsstöðum.  Þar mætum við sterku liði Skallagríms frá Borgarnesi.

Undirbúningstímabilið hjá Hetti hefur verið gott, liðið hefur æft vel og erlendu leikmennirnir koma sterkir inn í hópinn.  Liðið tók þátt í Greifamótinu á Akureyri, þar sem það vann Þór Ak. og Úrvalsdeildarlið Tindastóls en tapaði fyrir ÍR-ingum.  Liðið vann annan öruggan sigur á Þór Ak. í æfingaleik á Egilsstöðum í síðustu viku.

Sköpum nú góða stemningu á heimaleikjum Hattar í körfunni.  Allir á völlinn á fimmtudag!

Viðar og Frosti þjálfa í körfunni

  • Skoða sem PDF skjal

Nýr þjálfari verður við stjórnvölinn hjá körfuboltadeildinni en Viðar Örn Hafsteinsson mun þjálfa meistaraflokk félagsins auk þess er hann yfirþjálfari yngri flokka og stýrir drengjaflokki og 11. flokki. Viðar er heimamaður og lék með Hetti á ný í fyrra eftir nokkurt hlé en spreytir sig nú í fyrsta sinn á þjálfun í meistaraflokki. Undir hans stjórn vann hins vegar Höttur sinn fyrsta titil í körfuknattleik þegar 10. flokkur félagsins varð bikarmeistari í vor. Þá hefur Frosti Sigurðsson verið ráðinn þjálfari hjá yngri flokkum Hattar og mun leika með liðinu í vetur. Frosti mun einnig hafa umsjón með körfuknattleiksakademíu sem rekin verður við Menntaskólann á Egilsstöðum. Líkt og Viðar er Frosti heimamaður en þeir hafa báðir á undanförnum árum leikið með Hamri og Laugdælum. Þeir eru báðir íþróttakennarar að mennt og bindur körfuknattleiksdeild Hattar miklar vonir við ráðningu þeirra en stefnan er sett á að halda áfram að byggja upp öflugt starf í yngri flokkum félagsins.

Århus Basketball Festival - páskar 2011

  • Skoða sem PDF skjal

Í páskavikunni 2011 fóru nýbakaðir Bikarmeistarar í 10. flokki Hattar á körfuboltamót í Árósum í Danmörku.  Eitt sterkasta lið Danmerkur í áraraðir, Bakken Bears, halda þetta mót.  120 lið frá átta þjóðlöndum tóku þátt í mótinu. Eftir að hafa unnið sjö leiki í riðli og milliriðli komust okkar drengir í úrslitaleik mótsins í sínum aldursflokki. Þar mættu þeir þýsku meisturunum frá Redensburg og urðu að láta í minni pokann eftir spennandi leik. Þýska stálið tefldi fram tveimur leikmönnum yfir tvo metra á hæð og voru þeir erfiðir viðureignar. Silfur var frábær árangur og liðið eignaðist bikar - og týndi honum á kastrup á leiðinni heim. Úrslitaleikurinn var reyndar ekki eini leikurinn sem tapaðist á mótinu en einn leikmaður hattar skoraði á þjálfara hollensks stúlknalið í einn á eina og ætlaði að sýna henni hvar Davíð keypti ölið (eða sýna sig fyrir henni). Hún reyndist þá vera landsliðskona í körfubolta og tók okkar mann í nefið.

Fleira var gert en að spila körfubolta. Hópurinn fór í Legoland og Tívolí í Kaupmannahöfn og spókaði sig á Strikinu. Þetta var ekki síður mikilvægur hluti ferðarinnar og samheldinn hópur var félaginu til sóma hvar sem hann fór. Félagslega var ferðin frábær, góður endir á tímabilinu og við vonumst til að geta sent unglingaliðin okkar oftar á þetta skemmtilega mót.

Karfan byrjar 8. september

  • Skoða sem PDF skjal
Körfuboltaæfingar yngri flokka hefjast 8. september. Viðar Örn Hafsteinsson þjálfar 11. flokk og Frosti Sigurðsson þjálfar aðra yngri flokka.  Æfingatafla og nánari upplýsingar verða birtar í vikunni hér á heimasíðu Hattar.

Uppskeruhátíð körfubolta

  • Skoða sem PDF skjal

Uppskeruhátíð yngri flokka körfuboltadeildar verður haldin í Íþróttahúsinu á Egilsstöðum fimmtudaginn 12. maí kl. 19.

Dagskrá:

  • Ávarp formanns
  • Veittar viðurkenningar
  • Leikir og sprell, barna og fullorðinna
  • Kaka og svali og óvænt gjöf fyrir alla iðkendur

 

Hlökkum til að sjá sem flesta, iðkendur og aðstandendur.

You are here