Körfuknattleikur

Yngri flokkar - Meistaraflokkur

Fréttir

Århus Basketball Festival - páskar 2011

  • Skoða sem PDF skjal

Í páskavikunni 2011 fóru nýbakaðir Bikarmeistarar í 10. flokki Hattar á körfuboltamót í Árósum í Danmörku.  Eitt sterkasta lið Danmerkur í áraraðir, Bakken Bears, halda þetta mót.  120 lið frá átta þjóðlöndum tóku þátt í mótinu. Eftir að hafa unnið sjö leiki í riðli og milliriðli komust okkar drengir í úrslitaleik mótsins í sínum aldursflokki. Þar mættu þeir þýsku meisturunum frá Redensburg og urðu að láta í minni pokann eftir spennandi leik. Þýska stálið tefldi fram tveimur leikmönnum yfir tvo metra á hæð og voru þeir erfiðir viðureignar. Silfur var frábær árangur og liðið eignaðist bikar - og týndi honum á kastrup á leiðinni heim. Úrslitaleikurinn var reyndar ekki eini leikurinn sem tapaðist á mótinu en einn leikmaður hattar skoraði á þjálfara hollensks stúlknalið í einn á eina og ætlaði að sýna henni hvar Davíð keypti ölið (eða sýna sig fyrir henni). Hún reyndist þá vera landsliðskona í körfubolta og tók okkar mann í nefið.

Fleira var gert en að spila körfubolta. Hópurinn fór í Legoland og Tívolí í Kaupmannahöfn og spókaði sig á Strikinu. Þetta var ekki síður mikilvægur hluti ferðarinnar og samheldinn hópur var félaginu til sóma hvar sem hann fór. Félagslega var ferðin frábær, góður endir á tímabilinu og við vonumst til að geta sent unglingaliðin okkar oftar á þetta skemmtilega mót.

Karfan byrjar 8. september

  • Skoða sem PDF skjal
Körfuboltaæfingar yngri flokka hefjast 8. september. Viðar Örn Hafsteinsson þjálfar 11. flokk og Frosti Sigurðsson þjálfar aðra yngri flokka.  Æfingatafla og nánari upplýsingar verða birtar í vikunni hér á heimasíðu Hattar.

Uppskeruhátíð körfubolta

  • Skoða sem PDF skjal

Uppskeruhátíð yngri flokka körfuboltadeildar verður haldin í Íþróttahúsinu á Egilsstöðum fimmtudaginn 12. maí kl. 19.

Dagskrá:

  • Ávarp formanns
  • Veittar viðurkenningar
  • Leikir og sprell, barna og fullorðinna
  • Kaka og svali og óvænt gjöf fyrir alla iðkendur

 

Hlökkum til að sjá sem flesta, iðkendur og aðstandendur.

Bikarmeistararnir í undanúrslit Íslandsmótsins

  • Skoða sem PDF skjal

Síðasta túrnering Íslandsmótsins hjá 10. flokki körfu fór fram í Garðabæ um helgina.  Höttur tryggði þar sæti sitt í undanúrslitum.  Leikir gegn KR, Stjörnunni og Njarðvík töpuðust en sigur gegn Þór Þorlákshöfn tryggði sætið.  Undanúrslitin fara fram 16. apríl og þar munum við mæta fjandvinum okkar úr bikarúrslitaleiknum, Stjörnunni, en í hinum leiknum mætast KR og Njarðvík.

Úrslit Íslandsmótsins verður ekki síðasta verkefni 10. flokks í vetur því í páskavikunni fara þeir á Århus basketball festival í Danmörku.  Mótið er haldið af sterkasta körfuboltaliði Danmerkur, Bakken Bears, og þar munu 110 lið frá átta þjóðlöndum etja kappi.  Spennandi verkefni fyrir strákana í lokin á góðu tímabili.

7. flokkur í mikilli framför

  • Skoða sem PDF skjal

Um helgina fór fram túrnering hjá 7. flokki í körfubolta í íþróttahúsinu á Egilsstöðum.  Auk Hattar voru ÍA, Valur og Ármann mætt til leiks.  Hattarstrákarnir stóðu sig mjög vel og unnu örugga sigra á Val og ÍA en töpuðu naumlega fyrir Ármanni.  Höttur vann þó riðilinn vegna reglna um að mæta með fullt lið til leiks og nota alla leikmenn.  Flottur árangur hjá 7. flokknum sem vinnur sig þar með upp um riðil en liðið hefur tekið miklum framförum í vetur.

You are here