Körfuknattleikur

Yngri flokkar - Meistaraflokkur

Fréttir

Góð byrjun í körfunni

  • Skoða sem PDF skjal

Hattarar koma sterkir til leiks í 1. deildinni í körfuboltanum, hafa unnið tvo fyrstu leiki sína og tyllt sér á toppinn í deildinni, ásamt Hamri og Val.

Í gærkvöldi fóru okkar menn á Skagann og unnu ÍA 73-89.  Leikurinn var sveiflukenndur því Höttur leiddi með 18 stigum eftir fyrsta leikhluta en Skagamenn komust inn í leikinn og náðu yfirhöndinni 45-44 snemma í þriðja leikhluta.  Þá setti Höttur aftur í fluggírinn, leiddi 51-70 eftir þriðja leikhluta og leit ekki til baka eftir það. Jöfn og góð frammistaða hjá Hattarmönnum en Frisco Sandidge var stigahæstur með 27 stig, Austin Magnús var með 20, Viðar 14, Andrés 13 og Benedikt 13.

Í fyrstu umferð fengum við Þór Akureyri í heimsókn í Íþróttamiðstöðina á Egilsstöðum og unnum öruggan sigur, 100-83.  Frisco var einnig stigahæstur í þeim leik en allt liðið lék mjög vel og varnarleikurinn var mjög góður.  Eysteinn Bjarni var sem límdur á sterkasta leikmann Þórsara sem einungis skoraði 2 stig í leiknum og þau af vítalínunni.  Það var afar ánægjulegt að sjá fulla áhorfendapalla á fyrsta leik Hattar og vonandi slær það tóninn fyrir veturinn.

Hattarliðið mætir greinilega vel undirbúið til leiks á mótinu og er til alls líklegt.  Ungu mennirnir stíga upp og Frisco og Austin Magnús eru báðir sterkir leikmenn og ekki síður prýðisdrengir sem falla vel inn í hópinn og taka þátt í öllu starfi félagsins.

Fyrsti leikur í körfunni á fimmtudag

  • Skoða sem PDF skjal

Höttur hefur leik í 1. deildinni í körfuboltanum með heimaleik gegn Þór Akureyri fimmtudaginn 11. október.  Leikurinn hefst kl. 18:30.

Þrír leikmenn hafa hætt með Hetti síðan á síðasta tímabili.  Það eru erlendu leikmennirnir Mike og Trevon og svo Bjarki Oddsson sem nú þjálfar líð Þórs og mætir með þá í fyrsta leik til Egilsstaða.  Í lið Hattar hafa bæst þeir Frisco Sandidge og Austin Magnús Bracy.  Þeir koma báðir frá Bandaríkjunum en Austin Magnús er hálfíslenskur og hefur áður leikið á Íslandi, með Val á síðustu leiktíð.  Annars er breytingin sú að ungir leikmenn Hattar eru orðnir einu ári eldri og reyndari.  Í leikmannahópi Hattar eru átta leikmenn innan við tvítugt.  Hinir hafa líka elst en það telst þeim ekki öllum til tekna.

Á næstunni munu leikmenn meistaraflokks Hattar ganga í hús og selja ársmiða á leiki Hattar.  Ársmiðinn kostar 5.000 kr. og gildir á alla níu heimaleiki Hattar í deildinni.  Aðgöngumiði á stakan leik kostar 1.000 kr. svo góð kaup eru í ársmiðanum og vonum við að bæjarbúar taki vel á móti leikmönnum og styðji við bakið á liðinu í vetur.

Tímatafla yngri flokka körfubolta

  • Skoða sem PDF skjal

Æfingatafla yngri flokka körfubolta er nú tilbúin og er birt á Hottur.is/Körfubolti/Yngri flokkar.  Hjá strákum verða æfingar í minnibolta (1.-6. bekk), 7. flokki (7. bekk), 9. flokki (8.-9. bekk) og 10. flokki (10. bekk og eldri).

Hjá stelpum verða æfingar í tveimur flokkum, minnibolta (1.-6. bekk) og eldri stelpur (7. bekk og eldri)  Í fyrsta skipti í langan tíma er nú boðið upp á æfingar fyrir stelpur í minniboltaflokki.  Eftirspurn hefur verið eftir þessu starfi og við bindum miklar vonir við að byggja upp í kvennakörfuboltanum.

Uppskeruhátíð körfuboltans, 31, maí, kl. 18:30

  • Skoða sem PDF skjal

Uppskeruhátíð yngri flokka Körfuknattleiksdeildar Hattar fer fram fimmtudaginn 31. maí kl. 18:30 í íþróttahúsinu.  Veittar verða viðurkenningar, farið í leiki og borðuð kaka.  Allir iðkendur og aðstandendur eru hvattir til að mæta og setja punktinn yfir i-ið eftir gott körfuboltatímabil.

Formlegum körfuboltaæfingum yngri flokka fyrir yfirstandandi tímabil lýkur eftir lokahófið.  Til stendur þó að bjóða upp á einhverjar sumaræfingar og verða þær auglýstar fljótlega.

Aðalfundur Körfuknattleiksdeildar, 24.4., kl. 18:00

  • Skoða sem PDF skjal

Aðalfundur Körfuknattleiksdeildar Hattar verður haldinn í Hettunni þriðjudaginn 24.4. kl. 18:00 (ath. kl. 18 eins og auglýst var í Dagskránni en ekki kl. 20 eins og segir í annarri frétt á heimasíðu Hattar).

Borði
You are here